शनिबार १ मंसिर, २०८१ | Saturday Nov 16, 2024
शनिबार १ मंसिर, २०८१ | Saturday Nov 16, 2024
काठमाडौं । गायक तथा संगीतकार टंक बुढाथोकीले पछिल्लो गीत ‘धन्यवाद’ सात भाषामा सार्वजनिक गरेका छन् ।
उनले धन्यवाद’ बोलको गीतलाई नेपालीसँगै, तामाङ, नेवारी, राजवंशी, थारु, खस र भोजपुरी गरेर सात भाषामा सार्वजनिक गरेका हुन् ।
शनिबार राजधानीमा आयोजित एक कार्यक्रममा उनले सात वटा भाषाको गीतको भिडियो एकै पटक सार्वजनिका थिए । उक्त गीतका सातवटै भिडियो ‘टंक बुढाथोकी’ युट्युब च्यानलमा एउटै समयमा सार्वजनिक भएको हो ।
बुढाथोकीले पछिल्लो पटक सार्वजनिक गरेको गीत धन्यवादका लागि एक वर्षदेखि नै मेहनत गर्दै आए पनि गीतको रेकर्डिङ भने ६ महिनादेखि हुँदै आएको बताए । बुढाथोकीले सात वटा भाषाको भिडियोका लागि १५ लाख रुपियाँ लगानी गरेको बताए ।
बुढाथोकीले आधुनिक तथा नेपाली चलचित्रका दर्जनौं गीतहरुमा स्वर दिदैका छन् । उनी भन्छन्, ‘ यसपटक दर्शकलाई केही नयाँ दिन खोजेको छु, यसको प्रतिफल पनि राम्रै हुनेमा आशावादी छु । सात वटा भाषाको गीत एकै पटक रेकर्डिङ गर्दा धेरै समय लाग्नुको साथै ठूलो चुनौती सामना पनि गर्नु पर्यो ।’
सात वटा भाषाका गीत मध्ये नेपाली भाषा र थारु भाषाको छुट्टै लिप्सिङ र भिडियो बनाएका छन् ।
गीतमा शब्द र संगीत दुवै टंककै छ भने, उनलाई गायनमा अन्नु चौधरीले साथ दिएकी छन् । टंक र अन्नुको यो पहिलो सहकार्य पनि हो । गीतको भिडियोमा राहुल शाह र समिश्रिका परियारको नृत्य तथा अभिनय छ ।
गीतको ६ वटा भिडियोको निर्देशक मोडल राहुल शाह नै हुन् भने छायांकन र सम्पादन पवन सुस्लिङले गरेका छन् । थारु भाषाको गीतको भिडियोमा भने नवराज उप्रेतीको छायांकन र अमृत चापागाईंको सम्पादन छ ।
