अदालत र प्राधिकरणलाई चुनौति दिँदै एनसेलको शेयर बेलायती कम्पनीलाई बिक्री

काठमाडौं । नेपालको अदालत र नियामक निकायलाई चुनौति दिँदै निजी क्षेत्रको दूरसञ्चार सेवा प्रदायक एनसेलको शेयर खरीद बिक्री भएको छ । 

एनसेलको होल्डिङ कम्पनी मलेसियाको आजियाटा समूहले एनसेलको ८० प्रतिशत शेयर बेलायतको स्पेकट्रलाइट युकेलाई बिक्री गरेको दावी गरेको छ । आज (शुक्रबार) उच्च अदालत पाटनले उक्त कम्पनीको शेयर बिक्रीसम्वन्धमा कारण देखाउ आदेश जारी गर्दै शेयर खरीद बिक्री रोक्नेसम्वन्धमा अन्तरिम आदेश दिनेनदिने सम्वन्धमा छलफल गर्न आउँदो मंसिर २५ गते सम्वन्धित पक्षलाई बोलाएको छ । 

आजै नेपाल दूरसञ्चार प्राधिकरणले पाँच प्रतिशतभन्दा बढी शेयर खरीद बिक्री गर्न आफ्नो स्वीकृति लिनुपर्ने कानुनी व्यवस्था औंल्याउँदै एनसेलको शेयर खरीद बिक्रीसम्वन्धमा जारी विज्ञप्ति र आएका समाचारहरुप्रति आफ्नो गम्भीर ध्यानाकर्षण भएको बताएको छ ।  
 
यसअघि बुधबार आजियाटा समूहले नेपालमा व्यवसायिक चुनौति बढेको दावीसहित एनसेलबाट बाहिरिने निर्णय गरेको थियो । एनसेलमा आजियाटा ग्रुप बर्हाडको ८० प्रतिशत शेयर स्वामित्व छ । बाँकी २० प्रतिशत नेपाली कम्पनी सुनिभेरा क्यापिटल भेन्चर प्रा.लि.को छ । 

अदालत र प्राधिकरणको नयाँ आदेश र निर्णय आएकै दिन एनसेलको शेयर आजियटाले बेलायती कम्पनीलाई बेचेको भन्दै प्रचार गरिएको हो । कानुनी प्रक्रिया पूरा नगरी गरिएको यो निर्णयले कम्पनी थप विवादमा पर्ने देखिएको छ । यो बेलायती कम्पनी पनि एनसेलको स्थानीय (नेपाली) साझेदार सुनिभेरा क्यापिटल भेन्चर प्रा.लि.का सञ्चालक भावना सिंह श्रेष्ठका श्रीमान सतिशलाल आचार्यको लगानी रहेको कम्पनी भएको बताइन्छ ।

उनले नै योजनाबद्धरुपमा एनसेलबाट आजियटाको शेयर बिक्री भएको देखाएर आफ्नो नियन्त्रणमा ल्याउने, आजियटाकै स्वार्थअनुसार नेपालमा दूरसञ्चारको व्यापार गर्ने र कर छल्ने योजना बनाएको यसअघि स्रोतले बताएको थियो । 

यसअघि पनि स्विडिस कम्पनी टेलिया सोनेराले आजियटालाई बिक्री गर्दा एक खर्ब ४० अर्ब रुपियाँभन्दा बढी मूल्य रहेको यो कम्पनी अहिले भने सोभन्दा सस्तोमा शेयर बिक्री गरिएको हो । सस्तोमा शेयर बिक्री गर्दा नेपाललाई पुँजीगत लाभकर तिर्नुपर्दैन् । शेयर किनेको आठ बर्षपछि आजियटाले आफू नेपालबाट बाहिरिएको दावी गरेको छ । यद्यपि उसले आचार्यमार्फत एनसेलमा आफ्नो स्वार्य कायम राख्ने छ । 

यो पनि पढ्नुहोस्ः

​आफ्नो स्वीकृतिबिना एनसेलको शेयर खरीद बिक्री नगर्न आजियटा र सतिशलाई प्राधिकरणको निर्देशन

​अदालतको आजको आदेशले आजियटालाई एनसेलको शेयर बिक्री गर्न रोकेको छः डा भण्डारी

​आजियटालाई एनसेलको शेयर बिक्री सम्बन्धी उच्च अदालत पाटनको कारण देखाउ आदेश

एनसेलको शेयर सतिशलाललाई बिक्री गरेको देखाएर नियन्त्रण कायम गर्ने आजियटाको योजना