हिमालय जेटको पहिलो सिधा उडान लण्डन–काठमाडौं हुने, यस्तो छ कम्पनीको योजना

काठमाडौं । बेलायतका नेपाली मुलका व्यवसायी दिपेन्द्र गुरुङको स्वामित्वमा रहेको हिमालय जेटले आफ्नो पहिलो सिधा उडान नेपालबाट गर्ने भएको छ । कम्पनीले विज्ञप्ति जारी गर्दै लण्डन तथा युरोपका विभिन्न शहरबाट आफ्नो सिधा नेपाल उडानको तयारी अन्तिम चरणमा पुगेको जानकारी दिएको हो । 

हिमालय जेट ब्रिटिस प्रिमियम हवाई सेवा कम्पनी हो, जसले लामो दूरीको उडान गर्नेछ । कम्पनीले सबै उडानहरु निर्धारित चार्टर एसीएमई मोडल, ईयू एओसी, क्यूथ्रि २०२५ मा आधारित हुनेछन् । बेलायतमा विगत सात बर्षदेखि बजार विश्लेषण र अनुसन्धानका क्षेत्रमा काम गर्दै आएको व्यावसायिक समूहले नेपालमा लामो दूरीको सिधा हवाई सेवा सञ्चालन गर्ने तयारी गरेको हो । 

कम्पनीले लण्डनबाहेक युरोपका अन्य शहरः पेरिस, फ्राङफ्रट, मेड्रिट र अष्ट्रेलियाको सिड्नीबाट पनि सन् २०२४ भित्रै सिधा नेपाल उडानको तयारी गरेको जनाएको छ । त्यस्तै, मकाओ, भेगस, लस एन्जलसलगायतका ठूला शहरहरुमा चार्टर उडानको तयारी गरेको पनि विज्ञप्तिमा जनाइएको छ । 

अन्तर्राष्ट्रिय उडानका क्षेत्रमा आफूहरुले विशिष्ट योगदान पुर्याउने बताउँदै हिमालय जेटले आफूहरु लक्जरी उडानमा एउटा उदाहरण नै बन्ने बताएको छ । गत सेप्टेम्बरमा ५४ हजारभन्दा बढिले माया र विश्वास गरेको र सो संख्या युरोपका अन्य शहरमा पनि उत्तिकै रहेको बताउँदै ग्राहकहरुलाई उडान क्षेत्रमा रहेका पाँच तारे होटल, रेष्टुरेन्ट, कार रेन्टल, सिनेमा तथा सपिङ मलहरुमा ७० प्रतिशतसम्मको भारी छुटको व्यवस्था गरेको जनाएको छ । 

हिमालय जेटले विश्वका विभिन्न शहरबाट नेपालमा सिधा उडान सुरु भएपछि नेपालको पर्यटन उद्योगले पनि निकै फड्को मार्ने आशा लिइएको छ । हिमालय जेटले नेपालमा उडान सुरु गरी ठूला शहरहरुसँगको सिधा कनेक्टिभिटि बढाउन लागेको कुराले नेपालका पर्यटन व्यावसायीहरु पनि खुशी भएका छन् । युरोप तथा अष्ट्रेलियाका विभिन्न शहरमा लाखौं नेपालीहरुको बसोबार रहँदै आएको छ । हिमालय जेटको उडान सुरु हुँदा उनीहरु लाभान्वित हुने अवस्था बन्नेछ । 

कम्पनीले भनेको छ, ‘हामीले आफ्नो पखेटा फैलाउने तयारी गरिरहेको बेला, सबै यात्रुहरू, साझेदारहरू र उड्डयन उत्साहीहरूलाई यस ऐतिहासिक क्षणको उत्साहमा सामेल हुन आमन्त्रित गर्दछौं ।’