सोमबार ७ असोज, २०८१ | Monday Sep 23, 2024
काठमाडौं । आगामी आव २०८१–८२ को बजेट सार्वजनिक भएको पहिलो दिनमै शेयर बजारमा निराशा छाएको छ ।
अर्थमन्त्री वर्षमान पुनले हिजो मंगलबार बजेट सार्वजनिक गरेका थिए । आशा जनाउने बजेट भनेर प्रतिक्रियाहरु आइरहँदा शेयर बजारमा भने निराशा देखिएको हो । यसले बजेटलाई शेयर बजारको अस्वीकृतिको संकेतको रुपमा हेरिएको छ ।
नेपाल स्टक एक्सचेञ्ज लिमिटेड (नेप्से)का अनुसार आज बजार २३.८१ अंकले ओरालो झरेको छ । एक दशमलव १२ प्रतिशतले बजार घट्दा नेप्से २१ सय अंकबाट तल झरेर २०८९.४२ अंकमा आइपुगेको छ ।
समग्रमा बजार घटे पनि वित्त समूह ०.।१४, होटल १.१३ र उत्पादनमूलक समूह २.६८ प्रतिशतले बढेका छन् । बैंकिङ समूह सबैभन्दा बढी २.८४ प्रतिशतले घटेको छ ।
आज ३१४ कम्पनीका १ करोड ७ लाख ३८ हजार १ सय ६९ कित्ता शेयर किनबेच हूँदा ४ अर्ब ५७ करोड ५० लाख ६३ हजार २ सय ७४.३९ रुपियाँ बराबरको कारोबार भयो ।
समग्रमा बजार घटे पनि चार वटा कम्पनीमा पोजेटिभ सर्किट लाग्यो । यूनिलिभर नेपाल, कालिञ्चोक दर्शन लिमिटेड, अपर लोहोरे खोला हाइड्रो र भगवती हाइड्रोका लगानीकर्ताहरुले १०–१० प्रतिशतले नाफा कमाएका हुन् ।
आज बुद्धभूमि नेपाल हाइड्रोका लगानीकर्ताहरुले सबैभन्दा बढी ९.४१ प्रतिशतले घाटा व्यहोरेका हुन् ।
यस्तै पोखरा फाइनान्सको उच्च कारोबार भएको छ । उक्त कम्पनीको १९ करोड ५२ लाख १० हजार ६सय ६५.५० रुपियाँ बराबरको कारोबार भएको नेप्सेले जनाएको छ ।
साताको पहिलो दिन आइतबार २२.१४ अंकले बजार घट्दा ४ अर्ब ४४ करोड १५ लाख ३८ हजार ४ सय ७१.७० रुपियाँ र बजेठको अघिल्लो दिन सोमबार ३.९३ अंकले बजार उचालिंदा ३ अर्ब ८९ करोड ३७ लाख ६४ हजार १ सय ४३.९३ रुपियाँ बराबरको कारोबार भएको थियो ।
हिजो मंगलबार गणतन्त्र दिवसको सार्वजनिक बिदाका कारण शेयर बजार बन्द रहेको थियो ।
