धावनमार्ग छोटो रहेको भरतपुर विमानस्थलमा एटीआर ७२ अवतरण गर्न दिने जोखिमपूर्ण निर्णय

काठमाडौं । नेपाल नागरिक उड्डयन प्राधिकरणले भरतपुर विमानस्थलको धावनमार्गको विस्तार नगरी ७२ र ८० सिट क्षमताका जहाजहरु अवतरण र उडान गर्न अनुमति दिने जोखिमपूर्ण निर्णय गरेको छ । 
 
धावनमार्ग छोटो भएको भन्दै उक्त विमानस्थलमा हालसम्म ४२ सिट क्षमता र सोभन्दा साना जहाजहरु मात्रै उडान र अवतरण गर्न अनुमति दिएको प्राधिकरणले आफ्नै मापदण्डलाई तोड्ने काम गरेको हो । 

धावनमार्गको लम्बाई ४५० मिटर मात्रै रहेको भरतपुर विमानस्थलमा यती एयरलाइन्सले ७२ सिट क्षमताको एटीआर जहाज उडान गर्न सकेको थिएन् । सोही कारण बुद्ध एयरले आफ्नो ४२ सिट क्षमता र सोभन्दा साना जहाजमार्फत एकलौटी उडान गर्दै चर्को भाडादर अशुल्दै आएको थियो । 
 
तर यही गएको असार ६ गते प्राधिकरणले श्री एयरलाईन्सको ८० सिट क्षमताको जहाज (क्यु ४०० ड्यास–८)लाई परीक्षण उडान गर्न अनुमति दिनुका साथै बुद्ध एयरको ७२ सिट क्षमताको एटीआर जहाज उडान गर्न अनुमति दिएको छ । यी खालका जहाज उडान र अवतरण गर्न धावनमार्गको लम्बाई कम्तिमा पाँच सय मिटर हुनुपर्छ । 

अहिले एटीआर ४२ जहाज बुद्ध एयरको मात्रै रहेकोले उसले मात्रै भरतपुरमा एकलौटी गर्न पाएको छ । अन्य वायुसेवा कम्पनीहरुले यो क्षमताका जहाज थप्न सकेका थिएन । यती एयरलाइन्सले आफूहरुले भरतपुरमा उडान गर्न चाहे पनि एटीआर ४२ नभएको, सो खालका जहाज किन्दा एटीआर ७२ जस्तै महंगो पर्ने भएकाले खरीद गर्न ढिलाई गरेको बताउँदै आएको छ । धावनमार्ग लम्बिएपछि भने आफूहरुले पनि उडान सुरु गर्ने सो एयरलाइन्सको भनाई छ । 

बर्तौलाले भने, ‘लोड कम बोकेर ३५–४० जना यात्रु मात्र जहाजमा बोकेर काम छैन् । एटीआर जहाज अवतरण गर्दा छाटो धावनमार्गमा बढी दबाब पर्छ । ब्रेक लगाउँदा टायर बाङ्गिन सक्ने सम्भावना बढी हुन्छ । अहिले भरतपुरबाट उडान गर्ने योजनामा हामी छैनौं । रन–वे बिस्तार भएपछि मात्र उडान गर्छौं ।’ 

यता प्राधिकरणका प्रवक्ता हंसराज पाण्डेले श्री एयरलाइन्सले परीक्षण उडान मात्र गरेको र त्यसको प्राविधिक प्रतिवेदन आइनसकेको बताए । उनले ८० सिट क्षमताको जहाज उपयुक्त हुने नहुने ? प्रतिवेदन आएपछि भन्न सकिने बताए । पाण्डेले भने, ‘वायुसेवा कम्पनीहरुले सुरक्षामा पूर्ण ध्यान दिनैपर्छ । ७२ सिटको जहाज अवतरणका लागि कम्तिमा १० गुर्ण सुरक्षित राख्नुपर्छ हाम्रो सिटममा । त्यो हिसाबले ७२ जना यात्रु लान सकिएन भने ५० जना लान सकिन्छ ? ५५ जना सकिन्छ कि 
?’

वायुसेवा कम्पनीहरुले आफ्नो रिपोर्ट हेरेर जहाज निर्माण कम्पनीसँग पनि सल्लाह गर्नुपर्छ भन्दै उनले निर्माण कम्पनीहरुको प्रतिक्रिया लिएर आफ्नो व्यवसायिक योजना बनाउनुपर्ने बताए । बुद्ध एयरले एक सातापछि भरतपुरबाट ठूला जहाज (एटीआर ७२) सञ्चालन गर्ने तयारी गरेको छ । 

बुद्ध एयरका अनुसार धावनमार्ग छोटो भएकाले जहाजका सबै सिट भरेर सञ्चालन गर्न नसकिने र जहाजले काठमाडौँबाट भरतपुर आउँदा ६० देखि ६२ जना र भरतपुरबाट काठमाडौँ जाँदा ५० देखि ६० जना यात्रु बोक्ने तयारी गरेको छ । अहिले उसले एटीआर ४२ मार्फत काठमाडौँ–भरतपुर दैनिक नौ वटा र भरतपुर पोखरा दैनिक एउटा उडान सञ्चालन गर्दै आएको छ । 

भरतपुर विमानस्थलमा धावनमार्ग विस्तारसँगै नयाँ टर्मिनल भवन निर्माण हुँदैछ ।