काठमाडौं । नेपाली राष्ट्रिय टोलीका कप्तान पारस खड्का अन्तर्राष्ट्रिय क्रिकेट काउन्सिल (आईसीसी)को टीट्वेन्टी खेलाडी वरीयताको अलराउन्डरतर्फ ४१ औं स्थानमा उक्लिएका छन्।
आईसीसीले हालै सार्वजनिक गरेको वरीयतामा पारस अन्तर्राष्ट्रिय क्रिकेटका राम्रा भनिएका खेलाडीलाई पछि पार्दै शीर्ष ५० भित्र पर्न सफल भएका हुन् ।
पारसले इङ्ल्यान्डका जोय रुट, बेन स्टोक्स, वेस्ट इन्डिजका काइरन पोलार्ड, जिम्बावेका सिकन्दर राजाजस्ता खेलाडीलाई पछि पार्दै पारसले ४१ औं स्थान ओगट्न सफल भएका छन् । वरियतामा रुट ४३ औं, पोलार्ड ४६ औं, स्टोक्स ४८औं र राजा ५३ औं स्थानमा छन्।
पारस टीट्वेन्टी क्रिकेटको ब्याटिङतर्फको वरीयतामा पनि समावेश छन्। उनी ब्याटिङतर्फ समावेश एक सय खेलाडीमध्ये ९३ औं स्थानमा छन्। टीट्वेन्टी खेलाडीको ब्याटिङतर्फ नेपाली खेलाडीमा उनी मात्र परेका छन्। अलराउन्डरतर्फ भने पारससँगै सोमपाल कामीले पनि स्थान बनाएका छन्।
अलराउन्डरतर्फ सोमपाल ६४औं स्थानमा छन्। उनीभन्दा पछाडि न्युजिल्यान्डका मार्क चापम्यान, दक्षिण अफ्रिकाका क्रिस मोरिस, अस्टे«लियाका मिचेल मार्सलगायतका खेलाडी छन्। सोमपाल टीट्वेन्टीतर्फ बलरको वरीयतामा पनि ९४ औं स्थानमा परेका छन्। बलरतर्फ उनीभन्दा अगाडि नेपाली खेलाडी वसन्त रेग्मी ७५औं स्थानमा छन्। बलरतर्फ पनि नेपाली खेलाडीमा वसन्त र सोमपाल मात्र परेका छन्।
