मङ्गलबार १५ असोज, २०८१ | Tuesday Oct 01, 2024
काठमाडौं । नवौं राष्ट्रिय खेलकुदअन्तर्गत र्‍याफटिङ आर–फोरमा कास्कीको प्याडल नेपालले पहिलो स्थान हासिल गरेको छ । उदयपुरका डम्बरबहादुर पुर्बोछानेले कायाक स्लालमको उपाधि जित्दा प्याडल नेपालले पहिलो स्थान हासिल गरेको हो ।
प्रदर्शनी खेलको रुपमा समावेश र्‍याफटिङ र कायाकिङ अन्तर्गत आइतबार बिहान दोबिल्लाको सेती नदीमा सम्पन्न र्‍याफटिङ आर–फोरमा प्याडल नेपालको टोलीले उपाधि जित्यो भने काठमाडौंको र्‍याफटिङ एड्भेन्चर्स उपविजेता बन्न सफल भयो । कास्कीको र्यापिड रनर एक्सपिडिसन तेस्रोमा सीमित भयो ।
फुस्रे खोलामा भएको कायाक स्लालममा पुर्बोछानेले उपाधि जित्दा चितवनका नवीन श्रेष्ठ उपविजेता भए भने चितवनकै विजय गुरुङले तेस्रो भए । राष्ट्रिय खेलकुद परिषदका सदस्यसचिव टंकलाल घिसिङका अनुसार दोबिल्लामा प्रतियोगिताको उद्घाटन गरिएको थियो ।
सोही अवसरमा आइतबार नै सम्पन्न भएको र्‍याफटिङ आर–फोरका विजेताहरुलाई पुरस्कृत पनि गरियो । प्रदर्शनी खेलका रुपमा समावेश गरिएकाले र्याफ्टिङ एन्ड कायाकिङका पदकहरु नवौं वृहत राष्ट्रिय खेलकुदको आधिकारिक पदक तालिकामा गणना हुँदैन । विजेताले नवौं वृहत राष्ट्रिय खेलकुदको पदक प्राप्त नगरे पनि यो राष्ट्रिय संघले गराएको प्रतियोगिता भएकाले आधिकारिकता भने हुने जनाइएको छ ।
