पर्यटन क्षेत्र विस्तारै पुरानैलयमा, जुर्मुराउन थाल्यो पर्यटन क्षेत्र: शाक्य

काठमाडौं । कोभिड–१९ महामारीले झण्डै तीन वर्ष खुम्चिएको मुलुकको पर्यटन क्षेत्र विस्तारै पुरानैलयमा फर्किएकाले पर्यटन क्षेत्र पुनः जुर्मुराउन थालेको व्यवसायीले बताएका छन् । 

महामारीपश्चात पर्यटन क्षेत्रमा लगानी बढिरेहको र पछिल्लो पटक विदेशी पर्यटक आगमनको सकारात्मक वृद्धिले पर्यटन क्षेत्रमा उत्साह थपिएको उनीहरूको बुझाइ छ । पर्यटकीय गतिविधिलाई चलायमान बनाएर यस क्षेत्रबाट मुलुकलाई आर्थिक समृद्धिको दिशामा अघि बढाउन सकिने उनीहरूको विश्वास छ ।

व्यवसायी शाक्यले महामारीपछि पुरानै लयमा फर्किरहेको पर्यटन क्षेत्रमा उत्साह थपिएको उल्लेख गरे । ठूलो लगानी गरेर मात्रै प्रतिफल आउन नसक्ने भन्दै उनले दीर्घकालिन सोचसहित लगानी सुनिश्चित गरेर मात्रै व्यापारमा हात हाल्नुपर्ने सुझाव दिए । ‘फरक र मौलिक’ ढङ्गको व्यापारले मात्रै सफलता हासिल हुने भन्दै व्यवसायी शाक्यले हरेक व्यवसायमा त्यसकिसिमको सोच हुन जरुरी भएको उल्लेख गरे । 

नेपाल पर्यटन बोर्डका निर्देशक लक्ष्मण गौतमले मुलुकको पर्यटन विस्तारै पुरानै लयमा फर्किएको र लगानी चुनौतिकैबिचमा पनि पर्यटन क्षेत्रमा उल्लेख्य लगानी भएकाले आगामी दिन पर्यटनका लागि निकै सुखद् रहने विश्वास व्यक्त गरे । “होटल क्षेत्रमा धेरै लगानी आएको छ, काठमाडौँ उपत्यका र उपत्यकाबाहिर लगानी विस्तार भइरहेको छ । यसले सङ्कटसँगै अवसर पनि आउछ भन्ने कुरालाई पुष्टि गरेको छ”, उनले भने । 

नेपालजस्तो प्राकृतिक, साहसिक सांस्कृतिक र मौलिक संस्कृतिका अथाह सम्भावनाको भरपुर उपयोग गर्नसकेको खण्डमा पर्यटमार्फत मुलुकको आर्थिक समृद्धिमा टेवा पुग्ने उनको भनाइ छ । सामाजिक अभियान्ता कृष्ण कँडेलले आन्तरिक पर्यटनलाई बढाउन सकेको खण्डमा विदेशी पर्यटक पनि उल्लेख्य संख्यामा नेपाल आउने विश्वास व्यक्त गरे । 

कम्पनीका अध्यक्ष कुमारबहादुर खाती (केसी) का अनुसार देशमै रोजगारीको अवसर सिर्जना गर्ने उद्देश्यले कम्पनी स्थापना गरेको बताउनुभयो । विदेशबाट नेपाल आउने पर्यटकका लागि होटल बुकिङ, राष्ट्रिय र अन्तर्राष्ट्रिय उडानका लागि ‘टिकेटिङ्’को सहज रुपमा व्यवस्थापन गर्ने कम्पनीको योजना छ । नेपालबाट विदेश जाने पर्यटकलाई सम्बन्धित मुलुकमा भ्रमणको सहजताका लागि आवश्यक प्रबन्ध गरिने जनाएको छ ।