‘राष्ट्रिय एकता कमजोर भएको बेला सेनाको संख्या घटाउने कुरा किन आयो ?’

काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले प्रधानमन्त्री पुष्पकमल दाहालले भारतीय नागरिक प्रितम सिंहबारे बोल्नै नहुने अभिव्यक्ति दिएको बताएका छन् । प्रधानमन्त्री दाहालले आफू सत्तामा टिकिरहनका लागि सिंहबारे दिएको अभिव्यक्तिले मुलुकको भूराजनीतिक अवस्था झनै गम्भीर बनाएको बताएका छन्  । 

शुक्रबार आयोजित ‘नेपालको भू–राजनीति तथा सामरिक चुनौतिहरु’ विषयक विचार गोष्ठीमा लिङदेनले प्रधानमन्त्री दाहालले अघिल्लो पटक प्रधानमन्त्री बन्दा पनि छिमेकीका लागि कम्फटेवल सरकार बनाउनुपर्ने धारणा राखेर विदेशलाई खुशी बनाउन खोजेकोमा अहिले  प्रधानमन्त्री हुन दिल्ली जानुपर्ने आशयको कुरा गरेको बताए । 

उनले भने, ‘देशको प्रधानमन्त्री भएको मान्छे भित्र के भो, के–के हुने गरेका छन ? त्यो सबैलाई थाहा छ । तर, जो नभन्दा पनि हुने कुरा । आम मानिसलाई सुनाएर गौरव गर्ने कुराको परिस्थिति निर्माण भएको छ कि मलाई त प्रितम सिंहले प्रधानमन्त्री बनाउन पटक पटक दिल्ली धाउनु भएको थियो भन्दा खेरी मेरो दिल्लीसँग राम्रो सम्बन्ध छ । र, दिल्लीसँग राम्रो सम्बन्ध भएको मान्छेको मैले जीवनी मैले यहाँ सार्वजनिक गरिरहेको छु भनेर सुनाएर देशबासीलाई प्रभाव दिन खोज्ने प्रधानमन्त्री अहिले मुलुकले पाईरहेको छ ।’ 

लिङदेनले थपे, ‘यो एउटा मात्रै घटना होइन । अलि अगाडि अघिल्लो पटक सरकार बनाउने क्रममा पनि अहिलेकै प्रधानमन्त्रीेले भन्नु भएको थियो– कि हामी फलाना फलाना दल मिलेर यो देशमा सरकार बनायौं भने छिमेकीहरुलाई कम्फटेवल हुन्छ भनेर । जसरी हाम्रो नेताहरु विदेशीको सेवा गरेर मात्रै, विदेशीहरुको साथ र समर्थन पाएर मात्रै सत्तामा बस्न सकिन्छ, सत्तामा रहन सकिन्छ भन्ने मनोदशाबाट प्रेरित हुँदै गएको अवस्था छ, त्यसरी नै हाम्रो भू राजनीतिक परिस्थिति पनि अत्यन्तै पेचिलो बन्दै गएको छ ।’ 

उनले नेपालको लागि अहिले अझै सकसपूर्ण परिस्थिति बन्दै गएको बताए । हिजो उत्तर र दक्षिणको कुरा मात्रै थियो, दक्षिण र पश्चिमको विशेष सम्बन्ध यी सबैलाई सन्तुलनमा राखेर, सबैसँग बराबरीको सम्बन्ध राखेर, सबैलाई आश्वस्त बनाएर देशलाई अगाडि लैजानुपर्नेमा, देशलाई सबै हिसावले परनिर्भर बनाउने र कसेको आडमा सत्तामा टिकिरहने जुन संस्कृतिको विकास भएको, त्यो गलत हो भन्दै लिङदेनले अहिले नेपाल गम्भीर भूराजनीतिको चपेटामा परेको अनुभूति गर्न सकिन्छ भने । उनले यो खतरा एउटा र उसको सत्ताका लागि होइन् सिंगै राष्ट्रको लागि हो भने । 

अध्यक्ष लिङदेनले नेपाली सेनाको संख्या कटौति गर्न नहुने पार्टीको अडान पनि राखे । मुलुकको राष्ट्रिय एकता कमजोर भईरहेका बेला नेपाली सेनाको संख्या कटौति गर्नुपर्छ भन्ने प्रस्ताव आउनु राम्रो नभएको बताए ।