दैनिक २० किलो सुन ल्याउन पाउने प्रस्ताव राष्ट्र बैंक पुग्यो, ‘अब बोर्ड बैठकबाट निर्णय हुन्छ !’

काठमाडौं । दैनिक सुन ल्याउन पाउने कोटा १० किलोबाट बढाएर २० किलो बनाउने प्रस्ताव राष्ट्र बैंकमा पुगेको छ । उद्योग वाणिज्य तथा आपूर्ति मन्त्रालयले प्रस्ताव राष्ट्र बैंक पुर्याएको हो ।

सुनको कोटा बढाउने प्रस्ताव राष्ट्र बैंकमा आइपुगेको बैंकका सहायक प्रवक्ता मुक्तिनाथ सापकोटाले जानकारी दिए । सापकोटाले भने, ‘सुन आयात गर्ने कोटा बढाउन बैंकमा पत्र आइपुगेको छ, अब बोर्ड बैठकबाट निर्णय हुनेछ ।’

राष्ट्र बैंकले सुनमा कोटा प्रथा सुरु गरेपछि सुन तस्करीको घटना बढ्दै गएको छ । वैदेशिक मुद्रा संचितिमा असर गर्ने भन्दै सुन आयातमा कोटा प्रथा सुरु गरिएको छ । हाल वाणिज्य बैंकहरुले पालैपालो सुन आयात गरेर बिक्री बितरण गर्दै आएका छन् । यसरी बिक्री गरेवापत बैंकले सुनको कुल मूल्यको ०.६ प्रतिशत कमिसन बैंकले प्राप्त गर्छन् । ल्याएको सुन धेरै समय बिक्री नभए होल्डिङ चार्ज समेत उनीहरुले लिन्छन् । 

बैंकले कोटा बढाउने र अर्थ मन्त्रालयले सुनको भन्सार महशुल बढाउँदा सुन तस्करीलाई थप सहज भएको छ । अर्थमन्त्री प्रकाशशरण महतले चालु वर्षको बजेटमार्फत सुनको भन्सार महशुल दर १५ प्रतिशत पुर्याएका छन् । विलासी वस्तुको आयात वृद्धि कम गर्न भन्सार दर वृद्धि सही विधि भए पनि यसबाट हुने दुष्परिणाम भने आंकलन गरिएको छैन् । यसले गर्दा सुन तस्करी मौलाउन पुगेको छ । सुन तस्करहरु मोटाएका छन्, जसको आंशिक लाभ सरकारी बेतनधारीहरुले लिने मौका पाएका छन् । 

सुन तस्करीमा छोटे सुन तस्करको मात्रै संलग्नता नभएर भारत तेस्रो मुलुकमा रहेका ठूला तस्करहरुको समेत हात रहेको सहजै अनुमान लगाउन सकिन्छ । सुन वाणिज्य बैंकहरुले मात्रै नभएर व्यावसायीहरुले पनि लयाउन पाउने माग गरिरहेका छन् । नेपाल सुन चाँदी व्यावसायी महासंघका पूर्व अध्यक्ष तेजरत्न शाक्यले व्यवसायीले पनि सुन आयात गर्न पाउनुपर्ने माग राख्दै आएका छन् ।