शुक्रबार ३० कात्तिक, २०८१ | Friday Nov 15, 2024
ललितपुर । काठमाडौं उपत्यकोको मुख्य र ठूलो नगरपालिकाका मेयर बालेन शाहलाई उपेक्षा गर्दै ललितपुर महानगरपालिकाका मेयर चिरिबाबु महर्जन एक्लै फोहोर व्यवस्थापनको अवलोकन गर्न नयाँ दिल्ली पुगेका छन् ।
काठमाडौंको फोहोर व्यवस्थापनको विषय अगाडि बढाउन बालेनलाई उपेक्षा गरेर चिरिबाबुलाई सुनियोजितरुपमा नेतृत्व गराउने प्रयास भइरहेको बेला चिरिबाबु एकाएक दिल्ली पुगेका हुन् ।
फोहोर व्यवस्थापन र आधुनिक सहरीकरणका असल अभ्यासबारे बुझ्न भन्दै नयाँदिल्ली पुगेका उनले दिल्लीको फोहोर व्यवस्थापनको स्थलगत अवलोकन गरेका छन् ।
यसअघि ‘उपत्यका मेयर्स फोरम’को बैठकमा आफूलाई अबमूल्यन गरी बैठक चलाउने प्रयास भएपछि बालेन बीचमा नै उठेर हिँडेका थिए । नेपवेष्ट नामक एक कम्पनीको संयोजनमा भएको उक्त बैठकमा उपत्यकाका अरु मेयरहरु मिलेर बालेनलाई निर्णायक हुन नदिने योजना बनाइएको थियो ।
सोही पृष्टभूमिमा चिरिबाबु एकाएक नयाँ दिल्ली पुगेका छन् । भारतको निमन्त्रणामा उनी नयाँ दिल्ली पुगेको ललितपुर महानगरपालिकाको भनाई छ । बुधबार नयाँ दिल्ली पुगेका चिरिबाबुले बिहीबारदेखि त्यहाँका शहरीकरण र फोहोर व्यवस्थापनका अभ्यासहरु हेरेका थिए ।
