‘खुम्बु ल्होसार कप’ फुटबल प्रतियोगिताका दुवै खेल बराबरीमा

काठमाडौं । काठमाडौंको सानोगौचरण खेलकुद मैदानमा भएको ‘खुम्बु ल्होसार कप’ फुटबल प्रतियोगिताको दोस्रो दिन आज २ खेल सम्पन्न भएका छ । 

महेन्द्र ज्योति एक्स् (पूर्व) बिद्यार्थी मंच र  खुम्बु यम्बु शेर्पा समाज बिच भएको पहिलो खेल ०–० गोल अन्तरमा टुङ्गिएको छ । उक्त खेलको म्यान अफ द म्याच खुम्बु यम्बु शेर्पा समाजका खेलाडी सोनाम शेर्पाले हात पारेका छन् । 

सोमबारबाट सुरु भएको प्रतियोगितामा ठमिछोवा र खुम्जुङ युवा क्लबबीच भएको पहिलो खेल निकै प्रतिस्पर्धात्मक र रोमाञ्चक बनेको थियो भने खेल १–१ गोल अन्तरकासाथ बराबरीमा टुङ्गिएको र खेलको म्यान अफ द म्याच ल्हाक्पा रिता शेर्पा चुनिएका थिए । यस्तै, सोमबारकै अर्को खेलमा आमाडब्लम युवा क्लबले खुन्दे कम्युनिटी क्लबलाई २–० गोलअन्तरले पराजित गर्दै बाजी मारेको र छिरिङ पल्जु शेर्पा उक्त खेलको म्यान अफ द म्याच बनेका थिए ।

शेर्पा समुदायको चाड ल्होसार (नयाँ वर्ष) पारेर विगत १३ बर्षदेखि आयोजना हुँदै आएको यो प्रतियोगीता सोलुखुम्बुस्थित खुम्बु पासाङ ल्हामु गाउँपालिकाको विभिन्न गाउँमा जन्मिएर हाल काठमाडौँमा रहेका युवाहरुबीच हुने र शेर्पा युवाहरुलाई खेलकुदप्रति लगाव बढाउनु, उनीहरुको प्रतिभा प्रदर्शन गर्नु र समुदायलाई जोड्नु यस खेलको उद्देश्य रहेको आयोजकको भनाई छ ।

८ दिनसम्म सञ्चालन हुने प्रतियोगितामा जम्मा १६ खेल हुनेछन् । शेर्पा समुदायको सबैभन्दा ठूलो फुटबल प्रतियोगिता ‘खुम्बु ल्होसार कप’ को यो १४ औं संस्करण हो । प्रतियोगितामा डमीछो फुटबल टिम, नाम्चे युवा समूह, खुम्जुङ युवा क्लब, आमाडब्लम युवा क्लब, खुन्दे कम्युनिटी क्लब, महेन्द्र ज्योती एक्स् (पूर्व) विद्यार्थी मंच, खुम्बु यम्बु शेर्पा समाज र खुम्बु भेटेरेन्स गरि ८ टिम सहभागी छन् ।

प्रतियोगिताको १४ औं संस्करणको आयोजना ठमिचो क्षेत्रका दुई संस्थाहरु यम्बु ठमिस्रो किदुग काठमाडौं र उमीछछोवा युवा समूहले संयुक्त रुपमा गरेका हुन् । यस प्रतियोगिताको बिजेताले खुम्बु ल्होसार कपको रनिङ सिल्ड, मेडल, प्रमाण–पत्रको साथमा नगद एक लाख रुपियाँ, उपविजेता टिमले मेडल र प्रमाण–पत्रको साथमा नगद रु पचास हजार रुपैयाँ र तेस्रो हुने टिमले नगद पुरस्कार रु पञ्चीस हजारको साथमा मेडल र प्रमाण–पत्र प्राप्त गर्नेछ । माघ २९ गतेबाट सुरु भएको प्रतियोगिता फागुन ७ गते समापन हुनेछ ।

कोशी प्रदेश सोलुखुम्बु जिल्लाको उत्तरी क्षेत्रमा अवस्थित रहेको खुम्बु पासाङल्हामु गापाबाट रोजगारीको सिलसिला तथा आफ्नो उच्च शिक्षाको लागि काठमाडौंमा छरिएर रहेका खुम्बुवासीहरुलाई एकीकृत गराउने र सो क्षेत्रको युवाहरुको प्रतिभा प्रदर्शन तथा प्रस्फुटन गर्ने मुख्य उद्देश्यका साथ सन् २०१० मा खुम्बु क्षेत्रको एक मात्र बिद्यार्थीहरुको छाता संगठन शेर्वी योदेन छोक्पाले शेर्पाहरुको महान पर्व ल्होसारको पवन अवसरमा खुम्बु ल्होसार कप फुटबल प्रतियोगिता सुरुवात गरेको आयोजकले जनाएको छ ।