खाँदबारी–नुम सडकखण्ड : दुई वर्षमा २८ प्रतिशत काम

सङ्खुवासभा । सङ्खुवासभामा निर्माणाधीन उत्तर–दक्षिण कोशी राजमार्गअन्तर्गत खाँदबारी–नुम सडकखण्डको कालोपत्र गर्ने कामले गति लिनसकेको छैन । खाँदबारीको लभिङहिलबाट नुमसम्म ३९ किलोमिटर सडकको कालोपत्रको ठेक्का लागे पनि ठेकेदारले समयमा काम नगर्दा यात्रुले सास्ती खेप्नुपरेको छ । उत्तर–दक्षिण कोशी सडक आयोजनाले अनुसार किमाथाङ्का–रानी सडकको सो खण्डमा ठेक्का लागेको दुई वर्ष बित्दा पनि २८ प्रतिशतमात्र काम सम्पन्न भएको जनाएको छ ।

ठेक्का लागेको दुई वर्ष बित्दा करिब २८ प्रतिशत मात्रै काम भएको उत्तर–दक्षिण कोशी सडक आयोजनाका सूचना अधिकारी नरेश जिरेलले जानकारी दिए । उनान्चालीस किलोमिटर कालोपत्रका लागि तीन खण्डमा ठेक्का आह्वान गरे पनि एउटै निर्माण कम्पनीको ठेक्का स्वीकृत भएको थियो । तीन खण्डको निर्माणको जिम्मा शर्मा–शिवशक्ति जेभी चितवनले पाएपछि निर्माणकार्य कछुवा गतिमा छ । 

रु एक अर्ब २८ करोडमा कालोपत्रको जिम्मा शर्मा शिवशक्ति जेभीले पाएको थियो । कालोपत्र गर्ने भनिएको ३९ किलोमिटर सडकमा ठेकेदार कम्पनीले ठाउँठाउँमा ग्याबिन तारजाली लगाएर चौडा बनाउने र नाली निर्माणलगायतका सामान्य काम मात्रै गरेको छ । ठेक्का सम्झौता गर्दा माइलस्टोनसम्बन्धी व्यवस्था रहेको र उक्त व्यवस्थाअनुसार ठेक्का सम्झौता १२ महिना अवधिभित्र ३० प्रतिशत ठेक्का सम्झौता रकमबराबरको वित्तीय प्रगति हासिल गर्नुपर्ने व्यवस्था छ ।

सम्झौताअनुसार वित्तीय प्रगति नगरेको भन्दै उत्तर–दक्षिण कोशी सडक आयोजनाले दिनको रु दुई लाख ५५ हजार हर्जनासमेत तिराएको छ ।

समयसीमाअनुसार काम सम्पन्न नगर्दा निर्माण कम्पनीले वित्तीय प्रगति नगर्ने ठेकेदार कम्पनीसँग करिब रु ७० लाख जरिवाना तिराएको सडक आयोजनाका सूचना अधिकारी जिरेलले बताए । 

खाँदबारीबाट चीनको सीमावर्ती किमाथाङ्कासम्म सडकको लम्बाइ एक सय ६२ किलोमिटर छ । उत्तर–दक्षिण कोशी योजनाले ट्रयाक खुलेको एक सय ३९ किलोमिटरमध्ये ३९ किलोमिटर सडक कालोपत्र गर्न लागेको हो । निर्माण कम्पनीले २०८१ असारसम्ममा ३९ किलोमिटर सडक कालोपत्र गरिसक्नुपर्ने सम्झौता भए पनि हालसम्मको प्रगति हेर्दा समयमा काम नसकिने देखिन्छ ।