दुग्ध किसानको पाँच अर्ब भुक्तानी नभए ट्याक्टर, गाई भैँसी सडकमा छोड्ने बास्कोटाको चेतावनी

काठमाडौं । नेकपा एमालेका सांसद गोकुल बाँस्कोटाले दुग्ध किसानहरुले सरकारसँग भिख नभइ पसिनाको मूल्य माग गरेको भन्दै उनीहरुलाई दिनुपर्ने पाँच अर्ब बक्यौता तत्काल भुक्तानी गर्न माग गरेका छन् । 

बिहीवार प्रतिनिधि सभा बैठकमा उनले सरकारले दुग्ध किसानहरुको करिव एक वर्षदेखिको माग सम्बोधन गर्न नसकेको भन्दै दुग्ध किसानको पाँच अर्ब बढीको रकम भुक्तानी तत्काल गर्न ध्यानाकर्षण गराए । दुग्ध किसानहरुले न्याय पाउनको लागि अब सडक आन्दोलन नभएर फ्रान्सको जस्तो गरी ट्याक्टर, गाई भैँसी सडकमा छोड्नुपर्ने हो ? भन्दै प्रश्न गरे । 

जनताको सरकार भएपछि जनताप्रति जवाफदेही हुनुपर्ने उनले बताए । बास्कोटाले अहिले पनि दुग्ध विकास संस्थानले एक अर्ब ५५ करोड भन्दामाथि भुक्तानी गर्न बाँकी रहेको बताए । उनले निजी क्षेत्र व्यापार र नाफामा मात्रै लिप्त हुँदा जवाफदेहिता नभएको बताए । 

बास्कोटाले लम्पी स्किनलाई लिएर अर्बौंको क्षति हुँदा समेत किसानहरुले बीमाको रकम लगायत गाईको मूल्य नपाएको बताए । उनले सरकारले एउटै वडामा ६ करोड भन्दा बढी रकम तिर्न बाँकी रहेको भन्दै यसमा सरकारको दृष्टिकोण माग गरे । बास्कोटाले दुग्ध किसानका समस्या समाधानमा प्रधानमन्त्री, अर्थ र कृषि मन्त्रीबाट जवाफ माग गरे । 

निजी क्षेत्र मुनाफा, व्यापार, आयात र कर छुट मात्रै पेश गर्ने भन्दा पनि उद्यमशीलतामा लगानी गर्ने आवश्यक रहेको उनले बताए । बास्कोटाले पाउडर दुध बाहिरबाट ल्याउने, दुग्धजन्य पदार्थ पनि बाहिरबाट ल्याउने नीति के हो ? भन्दै सरकारलाई प्रश्न गरे । 

उनले देशमा उत्पादन भएकाले वस्तु पुग्दा समेत बाहिरबाट आयात गर्नुपर्ने आवश्यकता नभएको बताए । नेता बास्कोटाले दुग्ध विकास संस्थानमा ११ सय मेट्रिक टन धुलो दुग्ध, ८५० मेट्रिक टन मखन १ करोड ४५ लाख भन्दा बढीको मौज्दातमा बसेको बताए । उनले सरकार अनुदान पनि नदिने र दुग्ध विकास संस्थान सुधार गर्न नचाहेको आरोप लगाए । 

नेता बास्कोटाले सरकारले दुधको भुक्तानी नदिँदा किसानहरु मल, बीउ, जनजीवन धान्न र औषधिहरु किन्न पैसाको अभाव र पीडामा रहेको बताए । उनले जनता दुःखमा पर्दा सरकार रमिता हेरेर बस्न नमिल्ने बताए । 

बास्कोटाले भने, ‘किसानले नङ्ग्रा ख्याएको, पसिना बगाएर परिवार र घर चलाउन चाहेको कुरालाई महिनौंदेखि भुक्तानी नदिएर किन रुवाउँदै छौं ? किसानलाई रुवाएर सरकार हासेर बस्ने हो ? जनताको सरकार होइन ? जनताप्रति जवाफ दिनुपर्छ कि पर्दैन ? अहिले पनि दुग्ध विकास संस्थानले एक अर्ब ५५ करोड भन्दा माथि भुक्तानी गर्न बाँकी छ । प्राइभेट सेक्टर व्यापारमा मात्रै लिप्त छ । नाफामा मात्रै लिप्त छ जवाफदेहिता छैन । निजी क्षेत्रले दुग्ध नकिन्दा पनि सुख पाउँछ ।’ 

उनले दुग्ध विकास संस्थानको क्षमता विकास, स्टोरेज, वितरण प्रणाली, कर्मचारी नियुक्ति अधिक दरबन्दी मिलान गर्न आवश्यक रहेको बताए । बास्कोटाले सरकारको नेपाल प्रहरी, नेपाल आर्मी जस्ता संस्थाहरुमा दुग्ध अनिवार्य रुपमा दुग्धजन्य पदार्थहरु जाने कुरा, चक्लेट उद्योगहरु सञ्चालन, धुलो दुग्ध उत्पादन गरी मुलुकभित्रका उद्योगलाई प्रवद्र्धन गर्ने विषयमा सरकारको ध्यान जानुपर्नेमा जोड दिए ।