शुक्रबार ३० कात्तिक, २०८१ | Friday Nov 15, 2024
काठमाडौं । समता घरेलु लघुवित्त वित्तीय संस्थाको एफपीओ आज बिहान बाँडफाँट भएको छ । बिक्री प्रबन्धक मुक्तिनाथ क्यापिटलको कार्यालय नारायणचौर नक्सालमा एफपीओ बाँडफाँट गरिएको हो ।
उक्त कम्पनीको थप सार्वजनिक निष्कासन (एफपीओ) मा १४ लाख ४२ हजार ४ सय २० जनाको आवेदन परेको थियो । उक्त एफपीओ ३५ हजार ९० जनाले १०-१० कित्ताका दरले पाएका छन् । आवेदन दिएका १४ लाखको हाल खाली भएको छ ।
लगानीकर्ताले बिक्री प्रबन्धकको वेबसाइट र मेरोसेयर एकाउन्ट बाट एफपीओको नतिजा हेर्न सक्नेछन् । सीडीएस एन्ड क्लियरिङले रिजल्ट हेर्न बनाएको वेबसाइट https://iporesult.cdsc.com.np/ र कम्पनीको वेबसाइटबाट पनि रिजल्ट हेर्न सकिने जनाइएको छ । त्यस्तै, शेयरहब एपबाट पनि एफपीओको नतिजा हेर्न सकिन्छ ।
कात्तिक १२ गतेदेखि कात्तिक २० गते अन्तिम दिन साँझ ५ बजसम्म एफपीओमा २ अर्ब १३ करोड ८ लाख ५७ हजार रुपियाँ बराबरको २ करोड १३ लाख ८ हजार ५७० कित्ताका लागि आवेदन परेको हो ।
कम्पनीले ३ करोड ५० लाख ९० हजार ४२५ रुपियाँबराबरको प्रतिकित्ता १०० रुपियाँ अंकित मूल्य दरका ३ लाख ५० हजार ९०४ः२५ कित्ता शेयर निष्काशन तथा बिक्री खुला गरेको थियो ।
साविकको मनकामना स्मार्ट लघुवित्तलाई गाभेपछि प्रबन्धपत्रमा भएको व्यवस्था बमोजिम शेयर पुँजी संरचना अनुपात संस्थापकको ६९.४८ प्रतिशत र सर्वसाधारणको ३०.५२ प्रतिशत कायम गर्नुपर्ने भएकाले एफपीओ जारी गरेको हो ।
एफपीओ निष्काशन तथा बिक्री प्रबन्धकमा मुक्तिनाथ क्यापिटलका अनुसार हाल ५६ करोड ४० लाख रुपियाँ रहेको लघुवित्तको चुक्ता पुँजी एफपीओ निष्काशनपश्चात् ५९ करोड ९० लाख रुपियाँ पुग्नेछ ।
