काँग्रेसले कार्यकर्ता बढाउन भ्रातृ तथा शुभेच्छुक संगठन अझै थप्ने

काठमाडौं । सत्ताधारी दल नेपाली काँग्रेस पार्टीको केन्द्रिय समिति बैठकमा थप भ्रातृ तथा शुभेच्छुक संगठन निर्माण गर्ने प्रस्ताव गरिएको छ । सोमवार शुरु भएको सो पार्टीको केन्द्रिय समिति बैठकमा कार्यकर्ता बढाउन भ्रातृ तथा शुभेच्छुक संगठनहरुलाई गति दिनका लागि थप संगठन निर्माण गर्ने प्रस्ताव पेश भएको हो । 

बैठकमा थप भ्रातृ तथा शुभेच्छुक संगठन निर्माणको प्रस्ताव पेस भएको नेपाली काँग्रेसका प्रवक्ता प्रकाशशरण महतले बताए । बैठकमा स्थानीय निर्वाचनको समीक्षा हुने र आगामी दिनमा निर्वाचन केन्द्रित भएर पार्टीलाई कसरी अगाडी बढाउने भन्ने विषयमा पनि छलफल हुने उनले बताए । 

महतले थपे, ‘मुलतः अब आउने निर्वाचनमा हामी केन्द्रीत हुन्छौँ । त्यसको लागि पार्टीलाई चुस्त, दुरुस्त ढंगबाट निर्वाचन अभियानलाई अगाडी बढाउने र समसामयिक राष्ट्रिय विषयवस्तु जति पनि छन्, चासो र चिन्ताका विषयहरु छन्, त्यस विषयमा पनि साथीहरुले राख्नुहुन्छ र समग्रमा केन्द्रिय समितिले नै साथीहरुको छलफलमा आएका कुराहरुको आधारमा हामी निस्कर्ष निकाल्छौँ ।’

प्रवक्ता महतले पार्टीको सम्पूर्ण भ्रातृ संगठनहरु पूर्ण रुपमा क्रियाशिल र गतिशिल हुने बताए । उनले नेपाली काँग्रेस नेतृत्वको सरकारले जनताप्रति समर्पित हुँदै जनताका तत्कालिक आवश्यकताहरुलाई केन्द्रबिन्दुमा राखेर काम गर्ने बताए । महतले भने, ‘चाँडै नै समग्र रुपमा हाम्रो पार्टीको समग्र भ्रातृ, शुभेच्छुक संगठनदेखि लिएर मुल पार्टी पूर्ण रुपमा क्रियाशिल हुन्छ । गतिशिल हुन्छ । त्यही अनुसार हाम्रो प्रचार अभियान अगाडी बढ्छ । परिचालन अभियान अगाडी बढ्छ । निर्वाचन केन्द्रित भएर अगाडी बढ्छ । मलाई लाग्छ यो सरकार पूर्ण रुपमा जनताप्रति समर्पित, जनताका तत्कालिक आवश्यकताहरु र देश र जनताको दीर्घकालिन जुन आवश्यकताहरु छ, त्यसलाई केन्द्रबिन्दुमा राखेर सरकारले काम गर्नुपर्दछ । त्यो अनुसार जानुपर्दछ । यी विषयहरुमा पनि आएका सल्लाह, सुझावलाई हाम्रो पार्टी सभापति स्वयम् प्रधानमन्त्री हुनुहुन्छ । उहाँले सहस्र त्यसलाई ग्रहण गर्नुहुन्छ ।’

महतले पार्टी केन्द्रिय समितिको बैठक केही दिनसम्म चल्ने जानकारी दिए । समसामयिक राजनीतिक विषयवस्तुहरुको सन्दर्भमा पार्टीका केन्द्रिय सदस्यहरुले धारणा राख्ने र समग्रमा केन्द्रिय समितिले धारणा बनाउने पनि उउनले बताए ।