चुनावपछि ऐतिहासिक सम्पदाहरुको डिजिटल प्रोफाइल तयार गर्ने उर्जामन्त्रीको आश्वासन

रथ, जात्रा, पर्व, खाना, पहिरन तथा गरगहनाजस्ता मौलिक संस्कृतिको व्यापक प्रवद्र्धन गरिने बताउँदै भुसालले हस्तकला केन्द्रहरूको स्तरोन्नति गर्ने, पर्यटकीय चक्रपथ, हाइकिङ तथा साइक्लिङ मार्ग निर्माण गर्ने बताइन् । त्यस्तै स्थानीय हिटी, पोखरी, राजकुलो, तालतलैयाको पुनःनिर्माण, संरक्षण र उपयोग गरिने पनि उनको आश्वासन थियो । कुनै पनि विधायिकीको यस्ता काममा नभई नीति निर्माणमा मात्रै भूमिका हुने भए पनि भुसालले भने मतदातालाई प्रलाभन देखाएकी हुन् । 
 
मन्त्री भुसालले निर्माणाधीन वागमती, नख्खु, कर्मनासालगायत करिडोर सम्पन्न गरिने प्रतिवद्धता पनि व्यक्त गरिन् । उनले विकास निर्माणका निकायहरुबीच उचित समन्वयका लागि नीतिगत पहल गरिने बताइन् । अध्ययन सम्पन्न भएका ग्वार्को, सातदोबाटो र एकान्तकुनामा फ्लाइओभर निर्माण गरिने बताउँदै भुसालले आफ्नो घोषणापत्रमा प्राकृतिक स्रोतको संरक्षण, उपभोग तथा स्थानीय स्रोतको सामुदायिकीकरण गरिने, स्वच्छ पर्यावरणका लागि विद्युतीय साधनकोे प्रवद्र्धन गरिने, जनसहभागितामुलक सरसफाई तथा वृक्षारोपणलाई प्रोत्साहन गरिने र कृषि पर्यटनको प्रवद्र्धन, खेतीयोग्य जमिनको संरक्षण, सहुलियतपूर्ण सिंचाईको व्यवस्था गरिने, कृषि उपजको व्यवस्थित संकलन तथा बजारीकरण गरिने आश्वासन पनि बाँडेकी छन् । 
 
मन्त्री भुसालले हरेक श्रमको आर्थिक मूल्यको समानताका लागि नीति निर्माण गरी कार्यान्वयन गर्ने प्रतिवद्धता जनाएकी छन् । त्यस्तै महिला हिंसाको उन्मूलन र हरेक क्षेत्रमा सुरक्षित महिला र बालबालिका हुने विषय पनि समेटेकी छन् । भुसालले ललितपुरमा रहेका विकास साझेदार संस्थाहरूसँग प्रभावकारी सहकार्य गर्दै थप नयाँ नियोगलाई आकर्षित गर्ने, क्लव र समूहलाई सवल तुल्याई परिचालन गर्ने पनि बताइन् । त्यसैगरी शैक्षिक तथा उद्यम ऋणको कार्यान्वयनमा सहजीकरण गर्ने, ज्येष्ठ नागरिक र दीर्घ रोगीका लागि स्वास्थ्यमा विशेष पहुँचको सुनिश्चितता गर्ने तथा ज्येष्ठ नागरिकमैत्री सार्वजनिक संरचनाको निर्माण तथा प्रवद्र्धन गर्ने उनले बताएकी छन् ।