सोमबार १४ असोज, २०८१ | Monday Sep 30, 2024
काठमाडौं । राष्ट्रिय स्वतन्त्र पार्टीका सभापति एवम् उपप्रधान तथा गृहमन्त्री रवि लामिछानेले आफ्नो पार्टीका साँसदहरुले इमान्दारिताका साथ काम गर्ने बताएका छन् । संसदमा सोमबार बोल्दै उनले आफू र आफ्ना साँसदहरुले कुनै पनि अनियमिततामा संलग्न नहुने प्रतिवद्धता जनाउँदै जनताले आफूहरुबाट गरेको आशा र विश्वासलाई टुटन नदिने बताए ।
लामिछानेले आफूहरुले नागरिकसमक्ष गरेका प्रतिवद्धता पूरा गर्न न्यूनतम साझा कार्यक्रममा समेटेर काम गर्ने बताउँदै ठूला भ्रष्टाचारहरुमा आफूहरु निर्मम हुने बताए । उनले संसदमा प्रतिपक्ष दलले रचनात्मक भूमिका खेल्नुपर्ने बताउँदै भने, ‘संसद प्रतिपक्षले रचनात्मक रुपमा सुझाव सल्लाह दिन सकेको खण्डमा त्यो खबरदारीलाई आत्मसाथ गर्दै जनताको चाहना अनुरुप काम गर्न सक्छन् । म अपेक्षा गर्छु। प्रतिपक्षी दलले अड्काउने होइन, सघाउने काम गरोस् भन्ने चाहन्छु ।’
लामिछानेले जनताले अपेक्षा गरेर आफूहरुलाई मत दिएको उल्लेख गर्दै जनमतअनुसार काम गर्न नसके चरम निराशमा मुलुक जाने बताए । उनले कुनैपनि कालखण्डमा भएको भ्रष्टाचारको छानविन गर्न सरकार लाग्ने समेत बताए ।
आफूले सम्हालको केही कामहरुको सुरुआत भइसकेकाले आम जनताले केही महसुस गरिसकेको लामिछानेको भनाई छ । उनले आफ्नो दलले पाएको मत निराशा होइन, आशाको भएको बताउँदै आफूहरुले पाएको मत जनताले बजाएको घन्टीको ध्वनी भएको बताए ।
कतिपयले यसलाई निराशाको मत भन्ने गरेको बताउँदै लामिछानेले भने, ‘म यसलाई निराशाको मत होइन, नेपाली जनताले दिनु भएको आशाका मत चन्न चाहन्छु । सम्पूर्ण राजनीतिक दलमाथि गरिएको आशाको मत हो ।’
