आइतबार १३ असोज, २०८१ | Sunday Sep 29, 2024
काठमाडौं। सर्वोच्च अदालतको आदेशअनुसार अघि बढेको नयाँ स्टक एक्सचेन्ज कम्पनीको लाइसेन्स प्रक्रिया रोक्न प्रधानमन्त्री पुष्पकमल दाहालले निर्देशन दिएका छन् ।
उनले मन्त्रिपरिषदमार्फत निर्णय गराएर अदालतलाई नै चुनौति दिनेगरी लाइसेन्स प्रक्रिया रोक्न निर्देशन दिएका हुन् । बुधबार भएको भनिएको निर्णय आज शुक्रबार मात्रै बाहिर ल्याइएको हो । प्रधानमन्त्री दाहालले बुधबार कै मितिमा निर्णय भएको बनाएर आज प्रक्रिया रोक्न निर्देशन दिएका हुन् ।
आम लगानीकर्ताले पुँजी बजारको विकासको लागि नयाँ स्टक एक्सचेन्ज कम्पनी ल्याउनुपर्ने, बैंकहरुले समेत लाइसेन्स पाउने गरी नयाँ ब्रोकर कम्पनीहरु थप्नुपर्ने आवाज उठाउँदै आएका थिए । सोहीअनुसार नेपाल धितोपत्र बोर्डले प्रक्रिया अघि बढाएको थियो । प्रक्रिया रोक्न सर्वोच्चमा रिट दायर गरिएको थियो । पछि सर्वोच्चले प्रक्रिया कानुनअनुसार नै रहेको भन्दै अघि बढाउन निर्देशन दिएको थियो ।
नयाँ स्टक एक्सचेन्ज कम्पनी छनोटका लागि प्रक्रिया अन्तिम चरणमा रहेको बेला प्रधानमन्त्री पुष्पकमल दाहालले अदालतलाई नै चुनौति दिँदै प्रक्रिया रोक्न निर्देशन दिएका हुन् । बोर्डले स्वतन्त्ररुपमा एउटा नयाँ स्टक एक्सचेन्ज कम्पनीलाई लाइसेन्स दिन अन्तर्राष्ट्रिय मापदण्डअनुसारको निर्देशिका तयार गरी प्रक्रिया सुरु गरेको थियो ।
तर लाइसेन्समा विभिन्न स्वार्थ समूहहरुले चासो देखाउँदै आएको थियो । प्रक्रिया रोक्न चाहाने समूहले प्रधानमन्त्री पुष्पकमल दाहाललाई प्रभावित पारेर रोक्ने प्रयास गरेको हो । नयाँ स्टक एक्सचेन्ज कम्पनीका लागि तीन वटा व्यवसायिक कम्पनीको आवेदन परेको थियो । तिनीहरुमध्ये उपयुक्त एक कम्पनी छनोटका लागि बोर्डले पाँच सदस्यीय मूल्यांकन समिति बनाई काम समेत अघि बढेको बेला प्रक्रिया रोक्न भनिएपछि लगानीकर्ताहरु रुष्ट बनेका छन् ।
