शुक्रबार ३० कात्तिक, २०८१ | Friday Nov 15, 2024
शुक्रबार ३० कात्तिक, २०८१ | Friday Nov 15, 2024
काठमाडौं । दोलखास्थित उत्तरी सीमामा बरामद भएको ११ किलो सुन प्रकरणमा चिनियाँ नागरिकसहित थप ३ जना पक्राउ परेका छन् ।
पक्राउ पर्नेमा चिनियाँ गेङ्रु, उनका सहयोगी सनत प्रधान र सुन किनबेचमा संलग्न लालबहादुर तामाङ रहेको नेपाल प्रहरीको केन्द्रीय अनुसन्धान ब्यूरो (सीआईबी)ले जनाएको छ ।
सीआईबीका प्रवक्ता नवराज अधिकारीका अनुसार उनीहरुलाई स्वयम्भुबाट पक्राउ गरिएको हो । पक्राउ परेकाहरुलाई मंगलबार नै जिल्ला प्रहरी कार्यालय, दोलखालाई बुझाउने तयारी गरिएको छ ।
यसै प्रकरणमा यसअघि सात जना पक्राउ परिसकेका छन् । सुनसहित ल्याइएको आलुको बोरा लुटिएपछि यो विषय प्रहरीसम्म पुगेको थियो । प्रहरीले पक्राउ परेकाहरुलाई संगठित अपराधको कसुरमा समेत अनुसन्धान र कारवाहीको तयारी गरेको छ ।
अनुसन्धानका लागि काठमाडौंबाट प्राविधिक पक्ष र डकुमेन्टेसनमा सहयोग गर्ने टोली समेत दोलखा पठाइएको छ । यसरी आउने तस्करीको सुन राजधानी काठमाडौंका विभिन्न स्थानमा बिक्री हुने गरेको पाइएको छ ।
