एफवानसफ्टद्धारा कर छली गरेको पुष्टि, छलीको १७ करोड कर दाखिला

काठमाडौं । एफ वान सफ्ट इन्टरनेश्नल प्राइभेट लिमिटेडले कर छली गरेको स्वीकार गरेको छ । आन्तरिक राजश्व विभागअन्तर्गतको ठूला करदाता कार्यालयले निर्धारण गरेको थप कर कम्पनीले दाखिला गरेको हो ।

कम्पनीले छली गरेको करिब १७ करोड कर दाखिला गरेको विभाग स्रोतले जानकारी दियो । कम्पनीको आर्थिक वर्ष २०७५–७६ को कारोबारमा कर छली भेटिएपछि ठूला करदाता कार्यालयले करिब १७ करोड पुनः कर निर्धारण गरेको थियो।  

प्रत्येक वर्ष आन्तरिक राजश्व विभागले आयकर र भ्याट (मूल्य अभिवृद्धि कर)को फाइल छनोट गरी कर परीक्षण गर्ने गर्छ । गत वर्ष विभागले १३३ वटा कम्पनीको फाइल छनोट गरी ठूला करदाता कार्यालय पठाएको थियो जसमध्येबाट ३५ वटा फाइल छनोट गरी कर परीक्षण गरिएको थियो । सो परीक्षणमा एफ वान सफ्टको फाइलमा पनि कैफियत भेटिएपछि अनुसन्धान गरेर पुनः कर निर्धारण गरिएको विभाग स्रोतको भनाई छ । 

ठूला करदाता कार्यालयले गरेको कर परीक्षणमा कम्पनीले मागेको खातापाता देखाउन आनाकानी गरेको थियो । कर अधिकृतलाई हैरानी पार्ने किसिमले एफवान सफ्टले थोरै–थोरै गरी विवरण पठाएको स्मरण गर्दै उनले कर परीक्षण रोक्न एक मिडियाका सञ्चालकमार्फत अनावश्यक दबाब दिने काम समेत गरेको बताए । यो कम्पनीमा कान्तिपुर मिडियाका सञ्चालकहरुको समेत लगानी रहेको छ । 

एफवान सफ्टको विभिन्न भगिनी कम्पनीहरु छन् जसमध्ये ई–सेवामा डेढ करोड रुपियाँ कर छली भेटिएको थियो । एफवान सफ्टले ब्राण्डिङ शीर्षकमा पनि ठूलो रकम विनियोजन गरे पनि त्यो रकम अपचलन परेको देखिएको भन्दै विभाग स्रोतले ठूलो रकम कम्पनीले खर्चमा देखाए पनि कुन पक्षहरुलाई भुक्तानी गरेको हो ? सो कुरा भने खुलाउन नसकेको बतायो । प्रचारप्रसारमा हुने खर्च स्पष्टरुपमा खुलाउनुपर्ने कानुनी व्यवस्था छ । 

भुक्तानी सेवा तथा प्रविधि क्षेत्रमा एकाधिकार जस्तै व्यापार गर्दै आएको एफवान सफ्टले सन् २०२२ को आम्दानीबाट मात्रै १३५ प्रतिशत लाभांश वितरण गरेको थियो । कम्पनीमा ३५ प्रतिशत विश्वास ढकाल एक्लैको शेयर रहे पनि सञ्चालकहरुबीच भने लामो समयदेखि विवाद कायम रहेको छ ।