काठमाडौं । नेपाल राष्ट्र बैंकका गभर्नर महाप्रसाद अधिकारीले आफ्नो समस्याबाट उम्किन राष्ट्र बैंकतर्फ बढी आशा गर्ने काम निजी क्षेत्रबाट भएको बताएका छन् ।
नेपाल आर्थिक पत्रकार समाजको कार्यक्रममा मंगलबार उनले अहिले बजारमा अपेक्षा सुन्दा निजी समस्यालाई ‘जनरलाइज’ गरेको देखिन्छ भन्दै भने, ‘आफ्नो समस्याबाट उम्किन राष्ट्र बैंकतर्फ बढी आशातित भएको देखिन्छ । राष्ट्र बैंकका आफ्नै सीमितता छन् । हामी नीति निर्माताको उद्देश्य कसैलाइ पनि ऋणमा डुबाउने होइन, धान्न सक्नेमात्र ऋण लिने अवस्था बनाउने हो ।’
गभर्नर अधिकारीले चालुपूँजी कर्जा मार्गदर्शनसम्बन्धी नीतिले कुनै पनि व्यक्तिलाई ऋण लिन नरोक्ने बताए । यो मार्गदर्शनको विशेषगरी ठूला व्यवसायीहरुले विरोध जनाउँदै आएको बेला उनले यसमा निजी क्षेत्रले अझै राम्रोसँग नबुझेकाले बुझाउनु आवश्यक रहेको बताए ।
अधिकारीले, ‘विरोधका लागि विरोध होइन, जहाँ समस्या छ, राष्ट्र बैंकमा आउनुस्, समस्या समाधानमा हामी तत्पर छौं’ भने । मुद्रास्फीति बढ्दा मौद्रिक नीति स्वाभाविक रूपमा कडा हुने बताउँदै उनले केन्द्रीय बैंकले तथ्यमा आधारित रहेर नीति बनाउने बताए ।
गभर्नर अधिकारीले मौद्रिक नीतिका आफ्नै सीमाहरु रहेको भन्दै सीमाभित्र बसेर उद्योगी व्यवसायीहरुको माग सम्बोधन गरिने बताए । मुलुकको वास्तविक अर्थतन्त्रको अवस्थाका आधारमा मौद्रिक नीति तर्जुमा गरिने बताए । अधिकारीले आगामी आर्थिक वर्षको मौद्रिक नीति राष्ट्र बैंकले मुलुकको अर्थतन्त्रको वास्तविक अवस्था भन्दा बाहिर नजाने बताए ।
उनले पछिल्लो समय उद्योगी व्यवसायीहरुका सुझाव र मागहरु व्यक्तिगत समस्यालाई सामुहिक बनाउन खोजिएको बताए । अधिकारीले बैंकको धेरै ऋण लिएर समस्यामा परिएका व्यवसायीहरुले बाहिर निस्कन राज्य र राष्ट्र बैंकले केही सहयोग गरिदिने आशा राष्ट्र बैंकले ल्याउने मौद्रिक नीतिमा ठोक्काउन खोलिएको महशुस भएको बताए ।
धेरै सुझावहरु आएपनि मौद्रिक नीतिका आफ्नै सीमा भएकाले धेरै हात फैलाएर हाँगा हाल्न सक्ने अवस्था नभएको उनले बताए । अधिकारीले मौद्रिक नीतिको सिमाभित्र बसेर काम गर्नुपर्ने भएकाले निजी क्षेत्रले पनि बुझ्न आवश्यक रहेको बताए ।
अधिकारीले कतिपय सुझावहरु कर्जाको भ्यालु बढाउन आएपनि तत्काल कर्जाको भ्यालु रेसिया बनाउन सक्ने अवस्था नभएको बताए । उनले अहिलेको लोन टु भ्यालु रेसिया हुँदा व्यवसायीहरु प्यानिक बनेको भन्दै कर्जाको रेसिया बढाउँदा व्यवसायीहरुले साँचो बुझाउँछु भनेर बैंकलाई आउने र पुनः समस्या दोहोरिन सक्ने बताए ।
नीति बनाउनेहरुको भुमिका व्यवसायीहरुलाई ऋणमा डुबाउने नभएर व्यक्तिहरुलाई उद्यमी बनाउने र धान्नेसक्ने ऋण दिने खालको वातावरण बनाउने भएको बताए ।
बैंकमा ऋण लिँदा कमिसन लिइन्छ भन्ने यो ठूलो बैंकिङ अपराध हो भन्दै अधिकारीले केन्द्रीय बैंकका लागि यो गम्भीर विषय हो भने । उनले प्रमाणसहित यस्ता कुरा ल्याउन चुनौति पनि दिए ।
गभर्नर अधिकारीले बैंकरले जहाँ नाफा छ त्यहीँ लगानी गर्छ भन्दै तर राज्यको उद्देश्य त्यो होइन भने । राज्यले साना उद्योग र साना ऋणीलाई संरक्षण गर्ने बताए । साथै गभर्नरले सहकारीको समस्या नियमनको अभावले आएको हो भन्दै नियमन हुँदैमा आत्तिनु नपर्ने बताए ।
उनले भने, ‘रेगुलेसन हुँदैमा आत्तिनु पर्दैन, सहकारीको समस्या नियमन अभावले आएको हो । नियमनले सिस्टम जोगाएको छ । विश्वास जोगाएको छ । रेगुलेसन आवश्यक छ, हामी त्यही अनुसार गरिरहेका छौं ।’