बागलुङ । मतगणना स्थलमा प्रतिनिधि राख्ने विषयमा विवाद चर्किँदा ढोरपाटन नगरपालिकामा नेकपा एमाले र सत्ता गठवन्धनका कार्यकर्ताबीच झडप हुँदा दुई जना घाइते भएका छन् । घाइतेमध्ये एकको अवस्था गम्भीर रहेको जिल्ला प्रहरी कार्यालय बागलुङले जनाएको छ ।
गम्भीर घाइते भएका ढोरपाटन नगरपालिका ९ का भीमबहादुर विकलाई उपचारको लागि हेलिकप्टरमार्फत पोखराको मणिपाल अस्पताल लगिएको छ भने अर्का घाइते ढोरपाटन १ का ४० वर्षीय खिमबहादुर विकको बुर्तिवाङमा उपचार भइरहेको छ । उनीहरु दुवै एमालेका कार्यकर्ता हुन् ।
सर्वदलीय बैठकमा दलका प्रतिनिधि मात्र उपस्थित हुने सहमति भए पनि गठवन्धनबाट आवश्यकताभन्दा धेरै प्रतिनिधि आएपछि एमालेले विरोध जनाएको थियो । विवाद बढ्दै जाँदा सत्ता गठवन्धनका कार्यकर्ताले एमालेका कार्यकर्ता कुटेका हुन् ।