बिहीबार १७ असोज, २०८१ | Thursday Oct 03, 2024
काठमाडौं । नेपालमा समय अगावै मनसुन भित्रिए पनि आत्तिनु पर्ने अवस्था नरहेको जल तथा मौसम विज्ञान विभागले जनाएको छ ।
यस वर्ष समयभन्दा लगभग हप्ता दिन अगाडि नै मनसुन प्रवेश गरेको हो । विभागका अनुसार यस वर्ष जुन ५ मा मनसुन पूर्वी क्षेत्रबाट नेपाल भित्रिएको छ । नेपालका सबै क्षेत्रमा मनसुन सक्रिय हुन हप्ता दिन लाग्ने विभागले जनाएको छ ।
विभागकी प्रवक्ता विभूति पोखरेलले सधैँ एकै समय र मितिमा मौसम भित्रिने भन्ने नभएको भन्दै यसलाई नकारात्मक रुपमले लिन नमिल्ने बताए । उनले हरेक वर्ष सामान्यतया नेपालमा १३ जुनपछि मात्रै मनसुन भित्रिने गरेको तर यस वर्ष भने ५ जुनमा नै मौसम भित्रिसकेको बताए ।
पोखरेलले बंगालको खाडी आसपास विकसित न्यून चापीय क्षेत्रका कारण आइतवारबाट नेपालको पूर्वी भेगबाट मनसुन प्रवेश गरेको बताए । गत वर्ष नेपालमा १० जुनमा मनसुन भित्रिएको थियो ।
उनले भने, ‘यो वर्षको मौसम छिटो आएको छ । सामान्यतया हाम्रो मौसम जुन १३ पछि आउने गर्दथ्यो । यो वर्ष जुन ५ मा नै मौसम नेपाल प्रवेश गरेको छ । सबै वर्ष यस्तै हुनुपर्छ भन्ने छैन् । कहिले ढिलो, कहिले छिटो हुन्छ नै । त्यसैले यसवर्ष छिटै भयो । के भयो भनेर चिन्ता गर्नुपर्ने आवश्यक छैन ।’
तीन दिनमा केही स्थानमा हल्कादेखि मध्यम वर्षाको सम्भावना रहेको भन्दै केही शतर्क रहनुपर्ने बताए । पोखरेलले भने, ‘बाढीको कुरा गर्दा साना खोला बढ्ने तत्काललाई ठूला नदीहरुमा त्यस्तो शतर्कता अपनाउनु पर्ने देखिएको छैन् । तर बिस्तारै साना नदीहरुमा मनसुन लागिसकेकोले पानी बढ्ने क्रम हुन्छ ।’
मेघगर्जन चट्याङको सम्भावना रहेको भन्दै विभागले शतर्कता अपनाउन पनि आग्रह गरेको छ । यसवर्ष सरदरभन्दा बढी वर्षा हुने विभागको प्रक्षेपण छ । गत वर्ष पनि सरदरभन्दा बढी वर्षा भएको थियो । जसरकारण पनि आम मानिसहरु त्रस्त छन् । तर विभागले भने शतर्कता अपनाउन र त्रसित नहुन आग्रह गरेको छ ।
